Снимката на децата чии гласови уште не мутирале, а гласно пејат за дрога и за проститутки, повторувајќи ги зборовите на стиховите од песната „Ух“ на српскиот трапер Девитo, всушност настанала во Македонија, на детски роденден, а родителите биле во истата просторија.

Сепак, исто се однесуваат и иста музика слушаат и децата од Србија и на цел Балкан, дознава Блиц од диџејот кој ја пуштал музиката забележена на виралната снимка.

Децата на снимката имаат 12-13 години, а песната „Ух“ дури не била ни прва, открива диџејот.

„Веќе три години работам во Македонија во клуб за деца и малку по малку станав еден од најпознатите диџеи за деца во цела Македонија, а причина за тоа е што на секое дете му исполнувам желба“, рекол диџејот Борјан Илковски (21).

Во кој македонски град и кога точно настанала снимката Борјан не сакал да каже, но повторувал дека ги прашувал родителите дали е во ред децата да слушаат што сакаат и дека добил потврден одговор – „само нека играат и пејат“.

Спорната песна која на Јутјуб од крајот на јуни до сега има повеќе од 8,5 милиони прегледи ја снимил изведувачот Девито. И тој на својот приватен Инстаграм ја споделил оваа снимка со коментар „нема понатаму“.