СКАНДАЛ: Половина лига во Молдавија вклучена во местење на натпревари
Европол и молдавската полиција уапсија четири лица поврзани со скандалот со местење на натпревари.
Дури пет од 10 екипи кои се натпреваруваат во првата молдавска лига учествувале во местење на натпревари. Европол и молдавските власти задолжени за борба против корупцијата се сомневаат дека во последните пет месеци се наместени околу 20 натпревари од првата лига.
„Се верува дека челниците на екипите, тренерите, менаџерите, фудбалерите и останатите посредници се дел од криминална мрежа за местење на натпревари“, стои меѓу другото во соопштението на Европол.
Според Европол, криминалците на наместените натпревари во молдавскиот шампионат се обложувале најчесто во Азија. Облозите изнесувале помеѓу 10.000 и 20.000 евра, а вкупната заработка изнесува околу 600.000 евра.
Досега се уапсени четири лица, извршен е претрес во 34 домови и канцелариите на еден клуб, а се запленети 20 мобилни телефони, документација и кредитни картички.
Молдавскиот центар за борба против корупцијата се сомнева на 11 лица кои ги подмитувале играчите и судиите и ги местеле натпреварите.