Речиси секое македонско семејство лани имало телевизор во боја (96,3 отсто), но од црно-белиот „прозорец кон светот“ не се откажале 1,4 отсто од граѓаните. МАК-стат базата за трајната снабденост со добра, покажува и дека Македонците не заостануваат во комуникациите и 87,8 отсто имаат некаков мобилен телефон, но помалку од 50 отсто дома работат на персонален компјутер поврзан на Интернет (48,6 отсто). Радиото се слуша во една петтина од семејствата (19,8 отсто), а само 12 отсто слушаат музика на Хај-фај музички уреди. Со свој автомобил може да се пофалат 56,5 отсто од граѓаните, велосипед имаат над 37 отсто, а мотор само 6 отсто од граѓаните.

Добрата снабденост со трајни добра во 2022 година се огледува низ фактот дека во 96,3 отсто од кујните се готви на електричен шпорет, а еден процент помалку имаат машини за перење и пегли (95,4 отсто). И фрижидери и бојлери имаат сите (99,5 отсто), но само 64,1 отсто длабоко замрзнуваат производи. Македонските жени веќе одамна не користат метли, а правосмукалките брмчат во 90,5 отсто од домаќинствата, но за жал само една третина од домаќинките (32,1 отсто) не губат време во миење садови и за таа намена ги користат соодветните машини.

Без разлика на стратегиите за почист воздух, лани во 63,8 отсто од домаќинствата се готвело и греело на шпорети на цврсто гориво, една четвртина се топлат на печка на цврсто, а со секакви видови на електрични печки дури 37,2 отсто. Некогашните нафтарици ги чуваат уште 1,8 отсто од домаќинствата. Меѓу интересните статистички податоци е и оној дека без разлика на евтината гардероба, во 13,3 отсто од домаќинствата понекогаш се „открива“ и машината за шиење, колку да се закрпи, или подврати некое алиште. Интересно е дека гитара свират само 0,5, а клавир дома имаат само 0,6 отсто од граѓаните.