Сирија денеска ги осуди воздушните напади на САД врз објекти за кои Пентагон вели дека припаѓаат на проиранската милиција, опишувајќи ги како негативен показател за политиката на новата американска администрација.

Американската акција беше изведена како одговор на неодамнешните ракетни напади на американски цели во Ирак. Пентагон соопшти дека нападот е одмазда за ракетниот напад извршен во текот на месецов, во кој беше убиен еден цивилен изведувач, додека еден американски војник и неколку припадници на коалиционите трупи беа ранети, пренесува Гласот на Америка.

Сириското Министерство за надворешни работи оцени дека станува збор за „кукавички” напад против меѓународното право и предупреди дека тоа ќе доведе до ескалација во регионот.

Американската војска изврши воздушни напади во источна Сирија по наредба на претседателот Џо Бајден. – По наредба на претседателот Бајден, американските воени сили извршија воздушни напади врз инфраструктурата што ја користат екстремистички групи поддржани од Иран во источна Сирија, изјави портпаролот на Пентагон Џон Кирби.

Најмалку 17 лица загинаа во нападите, соопштија денеска сириски извори, додека припадник на проиранската милиција изјави дека еден од нивните членови е убиен, а неколкумина се ранети.

Овој напад е прва американска воена акција откако администрацијата на новиот претседател Џо Бајден ја презеде функцијата. За време на претходната администрација, предводена од Доналд Трамп, нападите и контрнападите доведуваа до зголемување на тензиите, кои кулминираат со американското убиство на иранскиот воен лидер Касем Сулејмани и иранскиот напад врз балистички ракети на американската војска во Ирак минатата година.