Во книгата „Географија“ за 9-то одделение на страница 62 има наслов „Мави Ватан“ (Сината татковина) за да можат учениците во Турција да почнат да се учат на таа конкретна доктрина. Во книгата се наведува дека концептот на „Сина татковина“ ги вклучува „поморските области на одговорност на Турција декларирани во согласност со меѓународното право, како и во согласност со правата и интересите на Турција. Како и езерата, реките и сите извори на вода“, пишува грчки Катимерини.

Според грчкиот новинар Манолис Костидис во книгата е направена двосмислена референца бидејќи се вели дека „површината на Турција достигнува 780.000 квадратни километри“ (т.е. сегашната површина на Турската Република), додека се додава дека има „и области под суверенитет на Турција кои се во границите на „Националната заклетва“, а тоа се границите на Сината татковина која е дел од татковината во морињата“. „ Националната заклетва “ од 1920 година, на која и денес се повикуваат турските националисти, беше наведено дека турските „законски граници“ вклучуваат области како што се Западна Тракија, Додеканезите, Северен Ирак итн.

Со објавената карта има допис и се препорачува на наставниците и на учениците „да им се дадат примери за борбата на Турција против неправедните тврдења кои ги игнорираат правните и географските интереси на земјата во Егејското Море и Источниот Медитеран“.

Според книгата, терминот „Сина татковина“ ја изразува стратешката важност на морињата, нејзините права во меѓународните односи, безбедноста на бреговите и морињата, одбраната на татковината и користењето извори на енергија (нафта, природен гас, ураниум итн.).

Книгата дава пример од говорот на Барбароса кој рече дека „оној што доминира со морињата доминира со светот“ и наведува дека „суверените права во морињата блиску до нас мора да бидат заштитени, како што е случајот со татковината, и експлоатацијата на морињата на најдобар начин“. На страница 63 од истата книга има и терминот „Небесна татковина “, кој е опишан вака: „Областа на небесната татковина (Националниот воздушен простор) го опфаќа небото над копнените граници, како и небото над соодветните поморски области“.

На истата страница се претставени домашно произведени беспилотни летала, како АНКА и тренажни авиони на Турција, како Хуркус и многу други системи. Изненадувачки е што оваа листа не ги вклучува беспилотните летала Бајрактар TB-2 и TB-3 кои ги произведува компанијата контролирана од Селџук Бајрактар, зетот на претседателот на Турција.

Според одлуката на Министерството за образование, новиот училишен материјал за кој беше одлучено во јули 2024 година постепено ќе се вклучува во училиштата и затоа повеќето книги што беа поделени имаат одобрение од просветниот одбор од претходните години.

„Според новата образовна програма наречена „Векот на Турција“, објавена во јули и достапна на веб-страницата на турското Министерство за образование, на часот по „Географија“ во 9-то одделение (средно образование, на возраст од 14 години) „ќе се дискутира за мапи поврзани со Сината татковина и Небесната татковина. Вредноста на патриотизмот ќе биде нагласена со вклучување на оправданата борба на Турција против барањата кои ги игнорираат нејзините законски и географски права во Морето на островите (т.е. Егејското Море) и Источниот Медитеран. Ќе се спомене важноста на Кипар за Турција и за турскиот свет“. Меѓутоа, во книгата се зборува за „Еге Денизи“ (Егејско Море) , а не за „Море на островите“, пишува Катимерини.