15-годишниот син на полската пратеничка Магдалена Филикс од владејачката партија Право и правда (ПиС) извршил самоубиство откако државно радио го идентификуваше како жртва на педофилија. Филикс изјави дека нејзиниот син Миколај се самоубил во февруари, пренесува „Гардијан“.

„Радио Шчечин“ претходно објави детали за жртвите на осуден педофил, што овозможи јавноста лесно да го идентификува синот на пратеничката. Радиото ја откри возраста на малолетните жртви и кажа дека една од нив е син на локална пратеничка.

Педофилот, кој бил осуден во 2021, бил опишан како поранешен член на Граѓанска платформа и ЛГБТ активист.

Полската јавност го осуди случајот кој брзо се прошири низ медиумите.

Опозициските политичари ја обвинија ПиС дека ја искористила приказната за сопствена политичка корист, и дека барем делумно е одговорна за смртта на момчето. ПиС цврсто ги контролира полските медиуми и води кампањи против ЛГБТ заедницата.

„ПиС ќе одговара за сите човечки штети и трагедии што ги предизвикала додека беше на власт“, изјави лидерот на Граѓанска платформа, Доналд Туск.