Денеска почнува јубилејната 30 сезона во Првата македонска кошаркарска лига, најтрофејниот клуб Работнички својот прв натпревар ќе го има денеска од 16.30 часот во малата сала на СЦ „Јане Сандански“ – Скопје на гостински терен против МЗТ Скопје Уни Банка.

Тимот од „Градски парк“ е предводен од тренерот Тони Симиќ, овој клуб е во фаза на своевиден „ребилдинг“ на сите клупски нивоа.

– Имаме целосно променета екипа и стручен штаб со некои 35 до 40 дена подготовки и засега сум задоволен од смисла на залагање на играчите на самиот тренинг како и Суперкупот каде пресуди немањето искуство на играње на ваков вид натпревари кај поедини играчи.

Грешките се грешки тоа се надополнува, но клучно беше искуството за овој млад тим. Кратко време сме заедно и овие играчи сè уште не се распознаваат на вистински начин и мислам дека како одминува сезоната ќе биде на уште повисоко ниво и поголем квалитет.

Целите за сезоната со оглед на промената на играчкиот и тренерскиот кадар е да се стабилизира клубот и да почне да доликува за Работнички, нешто што за нас е многу важно.

Амбициите конкретно е што е можно повеќе од младите играчи да испливаат на крајот на сезоната како носители за следната година и очекувам пласман барем во првите шест. Не бркаме шампионски титули, но сакаме да растеме од натпревар во натпревар – вели Симиќ.