Германската канцеларка Ангела Меркел денес вети „нула толеранција“ кон омразата, еден ден по нападот на синагогата во источногерманскиот град Хале каде загинаа две лица, а дргу две се потешко повредени, објави српски „Курир“.

И претседателот Френк-Волтер Штајнмаер денес ги повика Германците да застанат до своите сонародници со еврејска вероисповест.

– Претставниците на државата треба да ги употребат сите средства на правната држава за да се борат против омразата, насилството, за нив има нула толеранција – истакна Меркел.

Канцеларката која во знак на солидарност синоќа по нападот посети една од главните синагоги во Берлин, додаде дека е шокирана и преплашена од нападот, исто како и многу милиони луѓе во Германија.

Нападот го изврши 27-годишен Германец, кој бил тешко вооружен. Тој го сними својот напад и директно го емитуваше преку една интернет платформа. Тој се обиде да влезе во синагогата во Хале додека 80 илјади луѓе го славеа еврескиот празник Јом Кипур, а кога не успеа, тој пукаше кон луѓе кои стоеа пред неа и на една продавница која се наоѓа во близина.

Овој напад предизвика нова загриженост за засилувањето на екстремизмот на крајната десница во Германија и отвори прашања за одговорноста на полицијата.

– Не е доволно да се осуди таков кукавички чин. Мора да биде јасно дека државата презема одговорност за животите на евреите во Германија – рече денес германскиот претседател кој се сретна со евреите во една синагога, и нагласи дека целата заедниа мора јасно и одлучно да биде солидарна со евреите.

Штајнмаер исто така посочи дека историјата ги потсетува Германците, а сегашноста од нив бара да застанат на страната на еврејските сонародници.

– Тие кои досега молчеа, мораат да го кренат гласот – исткана германскиот претседател.