Сијарто предупредува на притисокот од мигрантите и бара НАТО да ја гарантира безбедноста на Европа
Шефот на унгарската дипломатија Петер Сијарто оцени дека притисокот од мигрантите на јужната и југоисточната граница на Европа претставува безбедносен ризик и оти НАТО треба да се справи со тие предизвици.
– НАТО мора ефикасно да се справи со предизвиците кои доаѓаат од југот и да се спротивстави на тероризмот и миграцијата доколку е гарант на европската безбедност, изјави денеска унгарскиот министер за надворешни работи за време на вториот ден од состанокот на министрите за надворешни работи од НАТО во Рига.
Тој предупреди дека „уште поголеми маси бегалци може да се појават на јужната граница на Унгарија” кои доаѓаат преку Западен Балкан.
Сијарто посочи дека мора да се развијат способности во земјите од јужна Европа за поефикасно решавање на безбедносните предизвици и истакна дека Унгарија ги поддржала напорите на Јордан, Либан, Тунис и Египет за зајакнување на нивните државни структури во борбата против тероризмот.
– Тероризмот предизвикува бранови на миграција, а миграцијата ја зголемува можноста за извршување терористички напади бидејќи терористите лесно можат да се сокријат меѓу бегалците и да стигнат до оддалечените делови на светот. Мора да го избегнеме тоа сценарио во Европа, изјави Сијарто.
Извор: МИА