Владата на Шведска денеска претстави пакет мерки во висина од 300 милијарди шведски круни (30,94 милијарди долари) за поддршка на економијата поради пандемијата со новиот коронавирус.

Пакетот мерки предвидува и Владата во целост да ги преземе трошоците на компаниите за боледувањата во април и во мај, како и голем дел од расходите за отпремнина поради привременото отпуштање на вработените поради кризата.

Шведската авиокомпанија САС, што делумно е во државна сопственост, вчера соопшти дека привремено ќе отпушти 90 отсто од вработените.

Најголем издаток за државната каса ќе произлезе од одлуката на компаниите да им се овозможи плажање на даноците и ДДВ до една година и тоа ретроактивно од почетокот на 2020 година. според шведската министерка за финансии Магдалена Андерсон, тоа на краток рок може да ја чини државата и до 300 милијарди круни.

Шведска претходно најави дека ќе ги помогне локалните власти со дополнителни средства со цел да им помогне во борбата против епидемијата со Ковид-19, додека Централната банка обезбеди 500 милијарди шведски круни за заеми за компаниите преку банкарскиот систем.