Шведската влада денеска донесе одлука за нова седумгодишна стратегија, вредна 560 милиони евра, за поддршка на реформите во земјите од Западен Балкан и Турција.

Од 560 милиони евра од фондот за стратегија за периодот 2021-2027 година, 500 милиони се наменети за Западен Балкан, а 60 милиони за Турција, соопшти шведската амбасада во Белград.

Соработката со Западен Балкан вклучува Србија, Црна Гора, БиХ, Северна Македонија, Албанија и Косово.

Континуираната соработка со земјите од регионот ќе ги зајакне условите за демократски и инклузивен развој, се вели во соопштението, и се додава дека новата стратегија на Шведска ќе ги интензивира напорите во областа на човековите права, демократијата, владеењето на правото, родовата еднаквост, инклузивниот економски развој, заштита на животната средина и климатски промени.

Шведската поддршка ќе биде фокусирана на зајакнување на мирољубивите и инклузивни општества и на „градење обемни и долгорочни односи“ меѓу Шведска и земјите од регионот, се вели во соопштението.

“Развојот во соседството на Европската унија е важен за Шведска и ЕУ. Во интерес на Шведска е да продолжи да работи со земјите од Западен Балкан за да придонесе за демократски развој, со фокус на човековите права, родовата еднаквост и владеењето на правото, “рече шведскиот министер за меѓународна развојна соработка Пер Олсон Фрид.

Шведска е еден од најголемите билатерални донатори на Западен Балкан. Според стратегијата, Шведска ќе продолжи да придонесува за поддршка на Европската унија за реформската агенда на Западен Балкан и нивно приближување со Унијата, се вели во соопштението.

Извор: Бета