Шведските власти денеска побараа издавање на налог за апсење на основачот на Викиликс, Џулијан Асанж, кој е во затвор во Велика Британија, соопшти шведското обвинителство.

Обивинителката Ева-Мари Персон изјави дека шведскиот суд одлучил да побара апсење за Асанж под сомнение за силување и ќе издаде европски налог за апсење.

Оваа одлука отвора можност за спор помеѓу Шведска и САД околу евентуалното испорачување на Асанж од Велика Британија.

Персон истакна дека британските власти ќе одлучат за евентуалниот конфликт помеѓу европскиот налог за апсење и американското барање да им биде предаден Асанж.

Асанж на 11 април беше исфрлен од Амбасадата на Еквадор во Лондон, во која  се сокри во 2012 година и веднаш беше уапсен.

Тој сега издржува затворска казна од 50 недели поради кршење на условите за кауција од 2012 година.

Шведското обвинителство на 13 мај повторно ја отвори истрагата околу обвиненијата за силување против Асанж.