Погледнете ги здравите навики на лекарите кои најдобро знаат како да се грижат за здравјето на срцето.

Бидејќи е една од најважните компоненти за целокупното здравје, важно е да јадете здрави намирници.

Ако се прашувате која од овие намирници спаѓа во категоријата „добри за здравјето на срцето“, Американското здружение за срце ги советува ДАСХ и медитеранската исхрана. Фокусот е ставен на разновидноста на свежите намирници, целите зрна, јаткастите плодови, рибата, пилешкото и мисиркиното месо и млечните производи со малку маснотии. Она што може да ве изненади е фактот колку вкусни јадења се кријат на оваа листа.

Бидејќи здравјето на срцето е секогаш еден од приоритетите, неколку кардиолози ги издвојуваат намирниците кои секогаш ги имаат во кујната и кои помагаат да се подготват вкусни и здрави оброци за кратко време.

1. Маслинки

Веројатно имате масло за јадење, но дали имате маслинки во нивната оригинална форма?

„Маслинките се полни со антиоксиданти, содржат малку јаглехидрати и многу здрави мононезаситени масни киселини. Сите се квалитети кои можат да го намалат лошиот холестерол, но го зголемуваат нивото на добриот холестерол и го намалуваат ризикот од срцеви заболувања“, вели д-р Сатит Бусри, кардиолог од Њујорк. Тој секогаш ги има во кујната, а сака да ги јаде како предјадење или да ги додава во разни јадења.

2. Лосос

„Јадете риба“, советува д-р Леонард Пјанко, кардиолог во Кардиоваскуларниот центар во Флорида.

„Лососот е секогаш во мојата кујна и е една од намирниците што секогаш со задоволство им ја препорачувам на пациентите бидејќи е погодна за одржување на здравјето на срцето, а исто така е многу вкусен“, додава тој.

Но, лососот не мора да биде единствената риба што ја јадете, секоја што содржи омега-3 масни киселини е добра за здравјето на срцето. Истражувањата покажуваат дека токму таквите намирници го намалуваат ризикот од хронични воспаленија, а последица на тоа е помал ризик од развој на болести на срцето, објаснил Пјанко.

3. Зелен лиснат зеленчук

Од кељ до спанаќ, не можете да претерате со овие намирници.

„Токму овој зеленчук е полн со влакна и може да се додаде во речиси секој оброк, од супи, салати до сендвичи, а може да се консумира сиров и термички обработен“, додава кардиологот, д-р Џон Озборн.

4. Мешунки

Покрај зелениот лиснат зеленчук, Озборн секогаш во кујната има многу мешунки (грав, грашок, леќа) и се обидува да ги додаде во повеќето оброци за да ги замени покалоричните намирници како месо и маснотии. Покрај тоа што се лесно достапни, во секој оброк ќе додадат добра доза на протеини, а може да се подготват како варива, салати, но и сосови. Тие содржат малку калории, но многу влакна, минерали и витамини и други фитонутриенти и ќе помогнат во намалување на холестеролот и контрола на крвниот притисок, намалување на ризикот од развој на срцеви болести.

5. Јаткасти плодови и семки

Како овошјето и зеленчукот, вашиот организам со консумирање на овие намирници ќе добие многу хранливи материи.

„Дома секогаш имам семки, бадеми, ореви и овес“, вели кардиологот Елизабет Клодас.

Овие намирници често ги комбинира со овошје, а резултатот е оброк полн со влакна, омега-3 масни киселини, антиоксиданти… За да го извлечете максимумот од нив, треба да ги консумирате во текот на денот, па додадете ги барем во два оброци.