Шри Ланка во страв: Затворена централната банка и патот кон аеродромот, апсењата продолжуваат
Влатите во Шри Ланка ја затвориле централната банка, како и патот кој води до аеродромот во Коломбо, стравувајќи од нови бомбашки напади во земјата, пренесуваат светските медиуми.
Полицијата продолжува со апсења, после бомбашките напади на Велигден, во кои починаа 359 лица, додека околу 500 луѓе беа повредени.
Во оваа островска држава владее нервозна атмосфера, а функционерите затвориле дел до главниот аеродром во престолнината на Шри Ланка, откако на тамошниот паркинг било забележано сомнително возило.
Претходно денеска е објавено дека на Шри Ланка се приведени 16 лица, меѓу кои има и странски државјани, во врска со истрагата за бомбашките напади.
На островот денеска се случила уште една експлозија, во градот Пугода, оддалечен околу 40 километри од Коломбо, но немало жртви ниту материјална штета.