Шпанскиот премиер Санчез следната недела во официјална посета на Кина
Шпанскиот премиер Педро Санчез следната недела ќе допатува во официјална посета на Кина на покана на кинескиот претседател Си Џинпинг за да работи на изнаоѓање мирно решение за ставање крај на војната во Украина, потврдија од неговиот кабинет.
Кина се обидува да ја преземе улогата на посредник во мировните преговори, поради што Си помина три дена во Москва претходно оваа недела, каде разговараше со рускиот претседател Владимир Путин. Кина се обидува да се позиционира како неутрална страна во војната и минатиот месец го претстави својот мировен план од 12 точки.
Членот на шпанската влада, Феликс Болањос, го оправда патувањето на својот премиер во Кина со тоа што Кина има клучна улога во мировните преговори. Во јули Шпанија ќе го преземе претседавањето со Советот на Европската унија, а пред еден месец, при посетата на Киев, Санчез изрази безрезервна поддршка за украинскиот претседател Володимир Зеленски, поддржувајќи го неговиот мировен план.
Санчез ќе го искористи своето патување во Кина за зајакнување на економските врски, па на 30 март ќе учествува на Форумот Боао за Азија во Хаинан, состанок сличен на Светскиот економски форум во Давос, а потоа ќе се упати во Пекинг на средба со Си.