На дербито Редси пред своите навивачи со 3:1 славеа против Арсенал и го задржаа максималниот учинок на бодови, вкупно девет на првата позиција на табелата.

Повторно блескаше египетската ѕвезда на „црвените“, Мохамед Салах кој во текот на второто полувреме двапати се запиша во листата на стрелците.

Египќанецот стрелаше најпрвин од пенал во 49 минута, а во 59-та имаше една прекрасна соло акција и уште поубава завршница за 3:0.

Претходно гол-серијата ја стартуваше Матип пред крајот на првото полувреме, а „топчиите“ успеаја само да го ублажат првиот пораз сезонава преку Тореира (85.)

На почетокот од денешната програма Челзи славеше на гостувањето кај Норич, а Манчестер јунајтед ги разочара своите фанови со пораз од Кристал Палас.