Американскиот рапер и продуцент Шон „Диди“ Комбс е тужен од неименуван маж кој тврди дека бил сексуално злоупотребен додека бил малолетен детски актер, објави „Форбс“.

Според тужбата поднесена во понеделникот до Вишиот суд на округот Лос Анџелес, тужителот, кој работел како детски актер од 2004 година, присуствувал на настан за професионално вмрежување во Холивуд Хилс во мај 2007 година, каде што бил присутен и Комбс.

Во судските документи се наведува дека Комбс побарал приватно да разговара со момчето за проект што наводно го продуцирал. Потоа, според наводите во тужбата, го одвел во посебна просторија, каде што му понудил алкохолен пијалак, а потоа наводно извршил сексуален чин врз него.

Тужбата не е насочена само против Комбс. Како обвинети се наведени и поранешните агенти на тужителот, кои, според наводите, учествувале во организирање настан што бил претставен како професионална средба од индустријата, а наводно му овозможил на Комбс контакт со малолетници.

Од друга страна, правниот тим на Комбс категорично ги негира обвинувањата.

„Обвинувањата на овој неименуван поранешен детски актер се лажни и апсурдни“, изјави портпаролот на Комбс, Џуда Енгелмаер, за „Форбс“.

Тој додаде дека станува збор за уште една тужба од лице кое се обидува да извлече финансиска корист од случаите поврзани со Комбс, нагласувајќи дека музичарот „никогаш не извршил сексуален напад врз никого, вклучително и врз деца“.

Обвинувањата засега остануваат непотврдени, а случајот ќе се разгледува пред суд.

Поранешната девојка на Диди засекогаш ја напушти Америка откако раперот ѝ плати 20 милиони долари