Вардар има тешко гостување в сабота (17.30 часот) кај екипата на Веспрем, а мечот доаѓа после високиот пораз од Кил. Дали Вардар ќе успее да се врати психички и да прикаже подобра игра останува да видиме.

„Веспрем Арената“ е жежок терен за секој противник, но не и неосвоива тврдина. „Црвено-црните“ знаат како е да се победува во оваа арена, тоа им успеа и минатата сезона кога славеа на гостувањето кај Веспрем.

Од друга страна, унгарскиот шампион во минатото коло ја прекина серијата од два последователни порази и пред своите навивачи убедливо го победи Порто. Картите се отворени, Вардар и Веспрем одлично се познаваат, шансите за победа се подеднакви, противникот има блага предност поради домашниот терен и преполната арена која е распродадена за овој меч.

Претходно се објави дека управата на клубот ќе биде во потрага по нов тренер, а привремено решение ќе биде Едуард Кокшаров.

Давид Дејвис, тренер на Веспрем:

– Вардар е бранител на титулата во Лигата на шампионите, еден навистина сериозен тим. Играат многу добро и од година во година се наоѓаат на врвот. Загубија единствено на нивниот последен натпревар во првите четири кола од групната фаза.

Андреас Нилсон, ракометар на Веспрем:

– Вардар е силен тим и ние загубивме во финалето од нив минатата сезона во Лигата на шампионите. Тие секогаш играат добро, но сега ја имаме предноста на домашен терен. Сакаме да продолжиме да играме добро и се обидеме да остатан двата бода со нас во Веспрем.

Расмус Лауге Шмид, ракометар на Веспрем:

– Вардар имаше лош натпревар минатиот викенд, како што ние загубивме, така и тие. Ранетиот „лав“ секогаш може да биде најопасен. Мораме добро да ја завршиме нашата задача и со истиот интензитет. Мораме грешките да ги сведеме на минимум како што тоа го направивме против Порто и мислам дека имаме одлична шанса да триумфираме в сабота.