Шкотските тинејџери два пати неделно самите ќе се тестираат за коронавирус по враќањето во училиштата
Според најавите на шкотските власти, тинејџерите од таа земја два пати неделно ќе се тестираат дома кога училиштата повторно ќе се отворат.
Тие ќе се тестираат самите или со помош на родител или старател, а ќе се користат брзи тестови кои веднаш даваат резултати.
Иако се работи за доброволна програма, министерот за образование Џон Свини смета дека е добро што повеќе ученици да соработуваат за училиштата да бидат заштитени од појава на жаришта, пишува Скај њуз.
Враќање во училишните клупи
Училиштата во Шкотска би требало повторно да се отворат на 22 февруари за почеток на второто полугодие. Прво ќе се отворат основните училишта.
Тестовите на почетокот ќе се понудат на училишниот персонал и учениците од поголемите одделенија, а би требало да се достават во училиштата оваа недела.
Британскиот премиер Борис Џонсон рекол дека училиштата во Англија нема да се отворат пред 8 март. Властите во Северна Ирска исто така наведоа дека училиштата најрано ќе се отворат во март.
