После ремито со Силекс, Шкендија во својот прв домашен натпревар од новата сезона во Првата македонска лига триумфираше дома со 2:0 против Скопје.

Уште во шестата минута тетовските „црвено-црни“ стекнаа предност после автоголот на Кировски (1:0).

А до крајот на првото полувреме проблемите за гостите драстично се зголемија откако дури двајца играчи добија црвени картони.

Најпрвин Христовски во 33 минута кој интересно претходно влезе во игра од 16 минута како замена за Божиноски, а во 37 минута теренот предвремено го напушти и Кировски.

Тоа го искористи составот на Артим Шаќири да постигне уште еден гол во 62 минута кога стрелаше Билали.

Следниот трет лигашки меч Шкендија ќе го има на 21 август кај Академија Пандев, а Скопје му гостува на кратовски Силекс.