Откако јавноста силно реагираше на фотографиите од изградбата на новиот објект над Градскиот трговски центар (ГТЦ), градоначалникот на Град Скопје, Петре Шилегов, денес објави дека е донесена одлука за демонтажа на времениот објект на оваа локација.

– Би сакал да ја информирам јавноста дека Град Скопје денес донесе одлука за демонтажа на времениот објект на кровот на ГТЦ, а тоа подразбира демонтажа на изѕиданите sидови од сипорекс блокови, демонтажа на кровниот покрив и демонтажа на челичната конструкција над подот – напиша Шилегов на Фејсбук, објавувајќи и фотографија од одлуката.

Тој дополнително ја објасни одлуката, информирајќи за процесот и консултациите кои претходеле на неа.

– По реакциите на граѓаните најпрвo беше донесена одлука за стопирање со работите на времениот објект. Сепак, земени се во предвид општата и стручната јавност, и по консултациите со Асоцијацијата на Архитекти и Иницијативата “Го Сакам ГТЦ”, од утре и официјално започнуваме со демонтажа на објектот, а на неговото место ќе биде посадена трева со ниско украсни цветни аранжмани, во согласност со постојниот проект за зелен покрив на ГТЦ – рече градоначалникот.

Тој додаде дека работата на останатиот дел од кровот е во полн ек, и во текот на следната недела ќе започнат работите за поставување на земјената подлога и во текот на месецов ќе можеме да го видиме поставувањето на првото зеленило.