Шилегов се премисли, наместо да го руши, ќе го догради мостот за панорамското тркало
Останува уште да се постават пристапни рампи и некои ситни зафати, и мостот оваа пролет ќе биде пуштен во употреба, најави Шилегов.
Градоначалникот на Град Скопје, Петре Шилегов, објави дека се отстранети фундаментите за Панорамското тркало од Вардар. Тој на Фејсбук напиша:
„Тргнати се фундаментите за панорамското тркало. Мостот не е во барок. Коритото на Вардар е чисто и проточно“.
Иако првично Шилегов тврдеше дека мостот на кој требаше да се постави панорамското тркало, ќе се сруши, сега најавува дека мостот ќе биде целосно готов и пуштен во употреба за два месеца.
“Откако ги направивме сеопфатно анализите беше констатирано дека разликата од доградба на мостот и неговото рушење е 500 000 евра. Значи толку би коштало да се доизгради мостот по редуцираниот проект без барокни елементи и панорамски тркала. Тоа е причината поради која одлучивме да го доизградиме пешачкиот мост. Напоменувам дека таму имавме потрошени неколку милиони евра. Проценката што требаше да ја направам е дали претходно потрошените 5-6милиони евра да ги фрлиме во Вардар или да го доградиме мостот за 500 000 разлика“, рече Шилегов.
Скопјани по новиот пешачки мост ќе може да се шетаат пролетва.
– Останува уште да се постават пристапни рампи и некои ситни зафати, и мостот оваа пролет ќе биде пуштен во употреба, најави Шилегов.