Шилегов ќе ги топли скопјани од 2020
Формалностите за изградбата и пуштање во употреба на топловодната мрежа се разрешени, правото на користење од „Балкан енерџи груп“ (БЕГ) се пренесе на Град Скопје, рече градоначалникот Петре Шилегов, на денешната седница на Советот на Град Скопје.
– Топловодната мрежа во Скопје беше дивоградба. Лани беа изработени 19 елаборати, по што мрежата се легализираше. Откако Владата ја пренесе сопственоста на мрежата, веќе во ноември очекуваме да добиеме лиценца за дистрибуција, а кон почетокот на наредната година и за снабдување со топлинска енергија – објасни Шилегов пред советниците.
Во меѓувреме, Градот го формираше и новото претпријатие „Градски енергетски системи“, кое според кажувањата на Шилегов ќе биде и носител на гасификацијата на Скопје.
Токму пренесувањето на топловодната мрежа во сопственост на Град Скопје, според првиот човек на градот, ќе биде можност на граѓаните да им се понуди поевтино парно греење, со што би се стимулирале граѓаните да се приклучат на мрежата на „Градски енергетски системи“. Тоа пак, според очекувањата на Шилегов, ќе придонесе во намалување на аерозагадувањето.