Шилегов: Би ги укинал централните инспекции, да не постои државен инспекторат

Би ги укинал централните инспекции, целосно да не постојат, да не постои државен инспекторат. Може да постои државен орган што ќе врши контрола на инспекторирањето на општинските инспекции, дури ни пазарната инспекција не смее да биде централна. Различни ни се приоритетите како органи, посочи градоначалникот на Град Скопје на дебатата „Како до ефикасни и независни инспекциски служби во Скопје” што ја организираше НВО Инфоцентарот.

Тој се осврна на неколку проблеми со кои се соочуваат општинските инспекторати, како и на потребата од итно менување на постојната регулатива.

– Недавањето на градоначалниците моќ или оставањето можност за институционален пинг-понг е причина поради која се наоѓаме во ваква состојба на терен. На пример, јас сакам да спроведам акција на Битпазар. Треба да се молам со Пазарна. Да не бидам лошо разбран, не велам дека е лоша соработката. Но, мојата правна позиција е дека треба да се молам со пазарната инспекција. Понатаму, во Железара има улица која ги дели општините Гази Баба и Бутел. Инспектор за животна средина од Бутел фаќа на лице место сторител како исфрла шут, човекот се легитимира, но шутот го исфрла десно, во Гази Баба. И инспекторот не му може ништо,посочи Шилегов.

Прочитајте и...  Приведен скопјанец баран со потерница

Скопје, според него, е многу поспецифично од другите единици на локална самоуправа имајќи го предвид, како што рече, дуализмот во локалната самоуправа. Затоа, посочува, одлучивме дека е паметно ова што го имаме како концепт.

– Еве да го отвориме предизвикот – да ги укинеме државните инспекции, имаме најкатастрофален Државен инспекторат за животна средина, со многу субјективни слабости, јас така ги дефинирам некои појави за кои сме сите свесни дека постојат. Па, Градскиот инспекторат излегува да мери ниво на загаденост на реки, па градски инспекторат фаќа криминал со медицински отпад. Медиумите се тука, прашајте ги обвинителите до каде се со тој предмет. Знаете дека стои? По прес-конференцијата тогаш, пред пандемијата, се крена малку фама, почнаа некои дописи, дојдоа некои истражители, фати пандемијата и се е под радар. Затоа системот за кој ние воочуваме дека е нефункционален треба да се исправи, со законски измени, рече Шилегов.

Прочитајте и...  Уште 1.093 новозаразени од ковид-19, починаа 28 лица, 819 се оздравени

Затоа, се надоврза тој, и се предлага регионален пристап во инспекторирањето, имајќи предвид дека не сите општини имаат капацитет да издржат инспекторат на свој грб, ниту пак имаат толкав човечки потенцијал.

– Сакам чекор по чекор да ги реализирам работите – ќе го направиме унифицирањето на инспекциските служби во општините од територијата на Град Скопје, ќе инсистирам до крај за носење на закон за комунална полиција која што не е само скопска, туку напротив, предвидува можност за регионализација, па ќе дојдеме до тоа дека треба да се укинат лиценците за инспекции, па ќе го предизвикаме државниот инспекторат, рече Шилегов.

Додаде дека категоријата на морална и човечка одговорност, надвор од политичката одговорност, за носителите на јавна функција е сериозен недостаток на нашето општество.

– Треба поодговорно да ја сфатиме функцијата која што ја имаме и да овозможиме да се формира систем кој што е функционален. Добриот дел од работата е што во СДСМ тоа го имаме увидено. И во програмата на Владата, ако видите, добар дел од овие работи за кои зборувам, а за кои сме се бореле внатре во партијата да влезат во приоритети, влегоа во приоритети и се во Програмата на Владата како измени на законски текстови или носење закони, рече Шилегов.

Прочитајте и...  Филипче: Матичните лекари ќе помагаат во болницата во Прилеп

Преговорите со Европската Унија, додаде тој, не ни ги носат вредностите на Европската Унија, туку, како што посочи, нашето менување во категоријата одговорност во работата што ја работиме ќе не однесе во квалитетно функционирање на институциите, како што впрочем сите посакуваме.

– Ама, никако да се централизира, не! Да се дисперзира, да се знае кој е крив. Ние сега имаме позиција дека градоначалниците можеби се добар чадор, политички гледано. Пример, паркирање на кеј. Логично е како граѓанин да викате „што прави градоначалникот”? Логично е. Затоа треба да внимаваме кога посакуваме централизација. Не, ние треба да дисперзираме, да унифицираме во смисла на лиценци и тогаш ќе може слободно да кажеме „е, сега, не е толку лесно и едноставно да ни се случуваат некои работи, како што ни се случуваат, нагласи Шилегов.

Извор:МИА

Поврзани вести

Откриени и мапирани нови археолошки локалитети и поединечни наоди на источниот брег од Охридското Езеро

Слободен печат

Нови 1022 позитивни случаи на ковид-19 во земјава, починати се 41 лице

Слободен печат

Хрватска: Уапсен сопственик на ноќен клуб поради ширење на ковид-19

Слободен печат

Демонстрантите во Полска не се откажуваат од барањето за измена на Законот за абортус

Слободен печат

Семејното насилство во Грција: Насилниците ретко одат во затвор

Слободен печат

АПСЕЊА ВО ЛОНДОН: 60 лица лишени од слобода на протестите против карантинот (ВИДЕО)

Слободен печат

Остави Коментар

MacedonianAlbanian