Канаѓанецот Колин Даулер се упатил на својот велосипед во шумскиот предел на Британска Колумбија, а сакал да истражи можна рута за планинарење. Иако мислел дека на овој пат ќе биде сам, наскоро пред него излегло гризли, јавува CBC.

На почетокот се надевал дека гризлито, како повеќето мечки, ќе сака да избегне контакт со луѓе и ќе продолжи по својот пат.

Тој размислувал дали да се врати назад, да ја заобиколи мечката или да остане во место, но животното решило да се залета право на него.

– Пробав да побегнам. Мечката брзо ме стигна, па и го фрлив точакот, рекол Даулер.

"All I could hear was the grating of his teeth against my bones." Colin Dowler describes how he managed to fight off a grizzly bear with a pocket knife in BC's backcountry. His amazing tale of survival tonight on @cbcnewsbc @CBCNews @CBCTheNational #cbc pic.twitter.com/5IDpxOYJvg

— Tanya Fletcher (@CBCtanya) August 1, 2019

Потоа пробал да се прави мртов. Додека неподвижен лежел на земјата, тој се сетил на својата последна надеж, малиот нож во џебот. Ножот бил подарок од татко му, само две недели пред настанот.

– Го фатив ножот најмирно што можев, а потоа веќе можев да го осетам здивот на мечката. Ми ги зари забите во ногата, осетив како забите удираат во мојата коска. Го боцкав со оштрицата по главата, а потоа успеав да му го забодам во врат. Тој нож ми го спаси животот – раскажа тој.

Иако бил тешко ранет, успеал да го најде својот велосипед. Возел 7 километри до најблискиот камп каде изгубил свест. На негова среќа, тука имало неколку кампери кои знаеле прва помош и така му го спасиле животот. Канаѓанецот бил префрлен во болница каде успешно се опоравува.