Министерката за одбрана, Радмила Шекеринска во вечерашниот дуел со Александар Николовски од ВМРО-ДПМНЕ, рече дека опозициската партија на почетокот на здравствената криза се потсмевала со опасноста, и тој тип на играње топло-ладно не е она што би дало резулати во справување со кризата.

Ако има таков експерт што може да каже дека во август ќе нема заболени од коронавирусот, јас ќе бидам првата што ќе рече да има одлагање и изборите да се одржат тогаш, рече вечерва потретседателката на СДСМ и министерка за одбрана, Радмила Шекеринска.

Шекеринска во Отвореното студио на Телевизија 24, каде дебатира со потпретседателот на ВМРО-ДПМНЕ, Александар Николовски, нагласи дека СДСМ посакува да биде постигнат консензус, како и дека во однос на тоа со ВМРО-ДПМНЕ не се исти.

Според неа, изборите не се прашање на избор, туку неопходност. Ни треба, потенцира, целосно функционална држава која ќе се справува не само со епидимејата која според СЗО нема да запре ниту во декември, туку и со економската и финансиска криза.

-Во оваа тешка криза, едно нешто на кое граѓаните може да се потпрат, тоа е за прв пат довербата во начинот на кој се менаџира оваа криза. Тоа не сме го имале ниту еднаш досега. За прв пат имаме огромно мнозинство граѓани кои велат задоволни сме и имаме доверба во начинот на кој државата се справува со кризата. Причината за тоа е што владата не играше ситна политика, туку се потпре на експертите во областа. Тоа кај граѓаните создава верба. На самиот почеток на здравствената криза, токму ВМРО-ДПМНЕ се потсмеваше со опасноста. Тогаш Мицкоски велеше дека СДСМ ја измислува и зголемува кризата за да бега од избори. Дрва и камења фрлаа по Владата за прогласување на вонредната состојба. Тој тип на топло-ладно, лево-десно не води до резултати, рече Шекеринска.