Шекеринска: Мандатарот ќе одлучи за идниот министер за одбрана, се работи за чувствителен сектор

Радмила Шекеринска
Радмила Шекеринска / Фото: МИА

Одлуката е на мандатарот на кој кандидат ќе му ја даде довербата да биде идниот министер или министерка за одбрана, изјави денеска министерката за одбрана Радмила Шекеринска, која одговарајќи на новинарско прашање наведе дека според нејзините информации за тоа сѐ уште не е одлучено.

Според неа, постои една црвена линија која не треба да се минува, а тоа е да се сугерира кои би биле следните кандидати што би можеле да дојдат на ова место.

– Ова е задача на мандатарот. Јас ги пренесов моите размислувања дека се работи навистина за чувствителен сектор, сектор во кој не важат само домашните правила за одговорност, туку важат и НАТО правилата на одговорност, одговори Шекеринска на новинарско прашање дали има некој профил на човек кој би требало да ја преземе оваа функција, дали имала консултации и од партијата дали побарале нејзино мислење кој треба да седне на ова министерскто место.

Новиот министер или министерка, кој и да е, рече таа, наследува систем што е сложен, но систем кој веќе има резултати.

Шекеринска потенцира дека во одбраната секој ден ја покажувате сликата дали сте држава на која може да се верува, држава која стои до кажаното, како што подвлече, дали сте партнери или сојузници чиј збор вреди.

– Тука нема дилеми и на мандатарот му е јасно дека ќе биде потребен таков кандидат, таков министер, кој нема само да ја познава областа, бидејќи тоа е област што е навистина поспецифична, туку ќе биде спремен од првиот ден да ги испорачува обврските што ги имаме како НАТО членка, но и што ги имаме пред своите граѓани, изјави министерката Шекеринска откако денеска изврши увид во градежните работи кои се извршуваат на објектот каде е сместен Секторот за воена безбедност и разузнавање во касарната „Гоце Делчев”.

Тоа е комплексен и голем систем, повеќе од осум илјади луѓе се тука, истакна таа, систем што долго време бил занемарен, но и систем што досегашната Влада, убедена сум и идната ќе покаже дека е значаен за државата, не само на збор, туку ина дело со соодветни буџети и политики.

Таа нагласи дека има правила што важат за секој ресор и до додаде дека до нив се придржувала во сите изминати години.

– А тоа е дека одговорноста има име и презиме и секој од нас лично е многу одговорен за задачите што ги добива, истакна Шекеринска.

Таа наведе дека го завршува мандатот со добри вести и тоа прво дека буџетот продолжил да расте, секоја година за 0,2 процентни поени и дека релативно брзо има шанси да се донесе Законот за служба во Армијата.

Извор: МИА

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот