Министерката за одбрана и заменик-претседателката на СДСМ од партиското седиште изјави дека триесет години се зборува за НАТО, а денес се одбројува до полноправно членство.

– Денес НАТО е реалност. Седумдесет години по основањето на Алијансата, стануваме 30-та, најмлада членка на НАТО, но еднаква и рамноправна. Дваесет и пет земји – членки ги завршија ратификациските процедури во нивните парламенти. Синоќа и САД ратификуваа со убедливо мнозинство од 91 глас за, а само два против. Успешно ја приведовме кон крај една од двете најважни стратешки цели на нашите граѓани – рече Шекеринска.

Шекеринска вели дека овој успех е заработен.

– Должност на секоја влада е да ги остварува задачите околу кои општеството се обединува, кои се израз на неговата кохезија. А тоа е НАТО. НАТО чува под својот безбедносен чадор една милијарда луѓе. Да се биде дел од клубот чие мото е „Сите за еден – еден за сите” е не само гаранција за безбедноста и заштитата на територијалниот интегритет и суверенитет, туку е и порака кон светот дека ги разбираме и прифаќаме нашите одговорности во регионот и пошироко – истакна Шекеринска.

Да се биде членка на НАТО, потенцира, е предуслов за раст на економијата и отворање на работни места.

Шекеринска рече дека за две години имала чест да ја претставува државава на билатерални средби со 20-тина министри за одбрана на НАТО членки, а девет од нив ја посетија земјава за само една година.

– Имав две официјални посети на Пентагон. Во нашата земја повторно дојде секретар за одбрана на САД – нешто што не се имаше случено од 2004 година наваму. Ова меѓународно внимание кон нашата татковина не беше можно до пред две и пол години, бидејќи цели 10 години оваа земја немаше политичка визија, немаше политичко лидерство. Не можете да ја изолирате својата земја а да очекувате влез на инвеститори. Не можете да ја оддалечувате вашата земја од НАТО и ЕУ, а да очекувате пораст на странски инвестиции – истакна Шекеринска.