Австралија Опен стартува доцна вечерва, но, главното прашање не е кој ќе ја освои титулата. Многу поважна за тенисерите и јавноста е една друга дилема – колку е опасно да се игра во Мелбурн во време кога пожарите ја пустошат Австралија, а чадот од време на време знае да го помрачи небото над градот.

Тенисерите постојано се жалат на тешките услови во Мелбурн,уште на првиот ден од квалификациите кои се играа минатата недела мораше да интервенираат лекарските екипи. На Далила Јакуповиќ и беше укажана лекарска помош, додека на Бернард Томиќ му беше дадена боца со кислород поради загадениот воздух.

На еден ден пред стартот на првиот годинешен грен слем турнир, се јави еден од најталентираните тенисери на денешницата, Денис Шаповалов кој им се закани на организаторите.

– Нема да играм доколку чадот повторно ни се „закани“ на терените. Не сакам да ги ризикувам животот и здравјето, не сакам да играм во лоши услови кога пред мене се уште 10 до 15 сезони. Знам дека ова е грен слем турнир и одлична можност за напредок, но не сакам да излегувам на теренот доколку условите за игра не бидат како што треба – изјави Шаповалов.