Шампионот МЗТ непријатно изненаден од Гостивар
Денеска во рамките од третото коло во најдобрата македонска кошаркарска лига, составот на МЗТ Скопје Аеродром загуби на гостувањето кај Гостивар со резултат 80:78 (18:20, 23:19, 19:22, 20:17).
Резултатот 80:78 на семафорот стоеше дури на една минута и 10 секунди до крајот на сердбата, МЗТ имаше шанса да ги освои бодовите, но првин Д. Стојановски не реализираше тројка, а потоа од поле непрецизен беше и и Анунва.
За нивна среќа Доналдсон на 26 секунди до крајот утна две слободни фрлања, по што имаа уште една можност за пресврт, но и овојпат среќата не беше на нивна страна. Непрецизни во своите обиди беа уште Џабари и Крстевски, па на крајот гостиварци славеа голема победа.
Во победничките редови за Гостивар доминираа Г. Ѓелетовиќ со 21 поен (девет скокови) и Д. Тасовски со 17 поени (четири скокови).
На спротивната страна кај „металците“ О. Анунва беше прв стрелец со 19 поени (четири скокови), а капитенот Д. Стојановски запиша 18 поени.
После првиот пораз на МЗТ Скопје Аеродром и втората победа на Гостивар, сега овие две екипи се наоѓаат на делба на првото место со по пет бодови.
Се одигра уште еден меч од рундата, младите „штркови“, односно МЗТ Скопје Уни Банка загуби убедливо од Вардар со 75:95.