Северни ветришта ќе донесат цврст утрински мраз
Студена водушна маса која се спушта од север во деновите на викендот ќе донесе постудено и променливо облачно време со сончеви периоди.
На повисоките места се очекуваат нови, иако послаби, врнежи од снег, а можно е и во некои пониски предели да провее лапавица, прогнозираат синоптичарите.
Од вечерва и утре, особено долж Повардарието, ќе дува умерен до засилен ветер од северен и од северозападен правец.
Наутро температурите насекаде ќе се спуштат под нулата, особено за време на викендот и во првите денови од следната недела. Минималните ќе се движат од -9 до -2 степени, на планините и под -10. Студено ќе биде и во текот на денот, а максималната температура во целата држава нема да надмине девет степени, велат од УХМР.
АМСМ вечерва соопшти дека слаби врнежи од снег има во Крива Паланка, Крушево, Павлешенци и Берово, но и дека сообраќајот насекаде се одвива непречено, по влажни коловози.
На граничните премини од македонска страна нема подолги задржувања за влез и излез од државата.