Севернокорејскиот лидер Ким Џонг-ун нареди заострување на државните системи за итни мерки против коронавирусот поради глобалната пандемија. Наредбата ја даде додека претседаваше со состанокот на политбирото на владејачката Работничка партија, соопшти денеска државната новинска агенција КЦНА.

Средбата следеше во услови на економска и политичка несигурност во врска со глобалната пандемија на коронавирус што врши дополнителен притисок врз севернокорејската економија, веќе оптоварена со меѓународните санкции насочени кон запирање на нејзината нуклеарна програма.

Појавувајќи се по првпат во јавност во последните 27 дена, Ким ја истакна потребата од воведување на тревога и засилување на анти-епидемиските мерки.

Северна Кореја тестираше повеќе од 12.000 лица и не пријави потврдени случаи на коронавирус од почетокот на ноември, според Светската здравствена организација.

Вкупно 6.173 лица, од кои осум странци, беа откриени како сомнителни случаи, а 174 лица беа ставени во карантин во последната недела од октомври, соопшти СЗО.