Тренерот на Барселона, Кике Сетиен учествуваше во видео конференција со својот тим, што се емитуваше на клупскиот канал.

Неговиот клуб се подготвува да се врати на тренинзите со надеж дека сезоната ќе заврши нормално како и во изминатите години.

Денеска започнуваат тестовите на играчите и очекувањата се следната недела играчите да започнат со индивидуални тренинзи.

– Не сакам да освојам титула на ваков начин, по службен пат. Општо е договорено дека доколку првенството не се заврши, ќе се земе во предвид сегашниот пласман на табелата – рече Сетиен.

До прекинот на сезоната во шампионатот водеше Барса со 58 бодови, два повеќе од Реал Мадрид, додека во Лигата на шампионите на првиот дуел од осминафиналето во Неапол одигра нерешено 1:1 со Наполи на Елиф Елмас, а останува да се види кога и дали ќе се одигра реваншот на „Камп Ноу“ и каква ќе биде одлуката на УЕФА.

– Вистина е дека сите сакаме да ставиме крај на првенството, да победиме на сите натпревари во „Ла Лига“ и да ја освоиме Лигата на шампионите – рече амбициозниот Сетиен.