Сервер: САД ќе вршат зголемен притисок врз Софија за откочување на евроинтеграцијата на Северна Македонија

Фото: МИА

Администрацијата на американскиот претседател Џо Бајден се очекува да изврши зголемен притисок врз Бугарија за откочување на евроинтегративниот процес на Северна Македонија, а извршната наредба на Бајден е со цел да врши притисок за подобрување на владеењето на Западен Балкан.

Ова денеска за МИА го изјави Даниел Сервер, експерт за Балканот од универзитетот „Џон Хопкинс” во Вашинтгон. Сервер смета дека претпристапните преговори меѓу Скопје и Брисел за членство на нашата земја во ЕУ треба да се отворат во јуни.

– Се надевам дека тоа ќе се случи, но за жал земјите членки имаат право на вето за речиси сѐ во ЕУ, изјави Сервер.

Тој очекува американската Администрација да изврши притисок врз Бугарија за изнаоѓање брзо решение во однос на „апсурдните барања до Северна Македонија” поврзани со јазикот и историјата, што, според него, е причина за фрустрација во многу европски центри и во Вашингтон.

– Администрацијата ќе изврши голем притисок врз Бугарија. Иако, не сум убеден дека некој во Софија го слуша тоа, изјави Сервер.

Во врска со Извршната наредба на Бајден за санкции кон лица од Западен Балкан, Сервер вели дека таа е со цел да се изврши притисок врз владите во регионот да запрат со корупцијата и криминалот и да го подобрат владеењето на правото.

– Извршната наредба не е наменета само за Софија, туку до сите влади во регионот да си го исчистат дворот, смета Сервер.

Во однос на пресудата на Хашкиот трибунал за доживотен затвор за поранешниот командант на силите на босанските Срби, Ратко Младиќ, за воени злосторства и за геноцид извршени за време на војната во Босна и Херцеговина, Сервер вели дека пресудата според него дошла предоцна.

– Младиќ правдата го стигна предоцна. Светот ќе биде подобро место затоа што тој не ја избегна одговорноста, рече Сервер.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот