Серија А: Несторовски ја „грееше“ клупата, Удинезе никако да победи!
Денеска во заостанат натпревар од 10 коло во најсилното италијанско првенство екипата на Удинезе на домашен терен ремизираше 1:1 против Аталанта.
Македонскиот репрезентативец Илија Несторовски беше на клупата за резерви во тимот од Удине, но не доби минутажа.
Уште во првата минута поведе домаќинот со голот на Перејра, а непосредно пред паузата се случи израмнувањето (Муриел, 44`).
Удинезе во Серија А подолг период не знае за победа, односно веќе осум меча по ред во Серија А. Последен пат триумфираше на 12 декември лани на гостувањето кај Торино (2:3).
На табелата играчите на тренерот Готи се наоѓаат на 15 позиција со 17 бодови, само четири повеќе од Торино кој е во опасната зона за испаѓање од Серија А. Аталанта е на шестото место со 33 бодови, 10 помалку од водечкиот Милан.