Денеска беше одредена ждрепката и за женскиот дел од Вимблдон, а очите на фановите беа вперени во Серена Вилијамс и во Ига Швјонтек.

Швјонтек е прва тенисерка на светот и игра во неверојатна форма годинава, а во првото коло на Вимблдон ја очекува пресметка со Јана Фет од Хрватска.

Првиот сериозен испит за Швјонтек би требало да биде четвртфиналниот дуел со Американката Џесика Пегула.

Во проектираните четвртфинални пресметки доколку нема ниту едно изненадување би требало да сретнат и Паула Бадоса – Каролина Плишкова, Даниел Колинс – Онс Жабер, Марија Сакари – Анет Контавеит.

На Вимблдон ќе настапи и Серена Вилијамс која оваа недела се врати на терените по точно една година пауза поради повреда. Американката во првото коло ја чека дуел со Армори Тан од Франција, додека можна противничка во полуфиналето и е првата носителка Ига Швјонтек.