Американскиот Сенат синоќа донесе закон со кој се предвидуваат амбициозни инвестиции во науката и технологијата, претставен како „историска одлука” за спротивставување на економската закана на Кина и нејзиниот „авторитарен” модел.

Предвидени се над 170 милијарди американски долари за истражување и развој, поточно за да се охрабрат компаниите да произведуваат полупроводници во САД кои сега најмногу се произведуваат во Азија.

Глобалниот недостиг на тие производи влијае на многу клучни сектори – од производство на автомобили до телекомуникации.

Законот беше одобрен со 68 гласа и 32 против, и мора да биде усвоен од Претставничкиот дом на Конгресот, по што ќе го објави претседателот на САД, Џозеф Бајден.

Кина, која е во економска војна со САД уште од ерата на Трамп, е една од ретките теми на кои сегашниот демократски претседател е во континуитет со неговиот претходник на Републиканците и ужива широк консензус во Конгресот.

– Ако не сториме ништо, нашите денови како доминантна суперсила се избројани, предупреди лидерот на мнозинството демократи во Сенатот, Чак Шумер, непосредно пред гласањето.

– И затоа оваа регулатива ќе остане запаметена како еден од најголемите успеси и на демократите и на републиканците во Сенатот во поновата историја, нагласи тој, објаснувајќи дека новата регулатива „го отвора патот за најголеми инвестиции во науката и технологијата за неколку генерации”