Семејство поминало вистинска голгота: Бебе по пет неуспешни операции конечно само јаде и дише
Една година траела голготата на семејство од град од внатрешноста чие прво дете се родило со краток хранопровод. Породувањето пред една година е направено во струмичката болница каде докторите не знаеле што му е на детето, но откако добило тешка инфекција, го префрлиле во Скопје. По три дена била поставена дијагнозата и на 21 септември лани му била направена првата итна операција. Детето пет пати е оперирано на Клиниката за детска хирургија, но безуспешно. Во многу тешка состојба, приклучено на апарат за дишење, е испрaтено во Турција од каде по тримесечно лекување, почнало да дише без апарат, но проблемот со хранопродоводот останува нерешен. Потоа детето е пуштено дома каде за него четири месеци се грижи мајката во состојба кога тоа се уште не може самостојно да дише, а на стомакот има три отвори (стоми). Голготата на семејството завршува пред неколку дена кога бебето е оперирано во „Жан Митрев клиника“.
– Среќна сум што за првпат му го чув гласот на моето дете, дури и тоа беше збунето од својот глас. По операцијата за првпат моето дете откако е родено јаде преку уста. Сега е како здраво дете. Последната операција е направена на 21 септемрви годинава, точно една година од првата. Се надевам дека завршивме со овој дел од животот – вели во изјава за „Слободен печат“ мајката Босилка Н.
Нејзината бременоста се одвивала најнормално, а бидејќи и е прво дете, била и повнимателна и почесто правела контроли, но не се утврдил проблемот кој постоел кај плодот.
– На Детска хирургија ми велеа да не се поврзувам многу со детето, бидејќи може да не преживее – вели Босилка.
Операцијата во „Жан Митрев клиника“ не ја правел детски хирург, туку дигестивниот хирург Милчо Пановски и кардиохирургот Жан Митрев.
Направено е комплетно ослободување на градниот кош, ослободен е желудникот и дел од хранопроводот и потоа се поврзани, по што самиот желудник е подигнат и поставен во центарот на градниот кош, покрај дишникот. Детето по операцијата е под контрола на педијатар, анестезиолог и медицински персонал на единицата за интензивно лекување. Постоперативниот ток е уреден, детето се храни преку уста и дополнително преку сонда поставена во дванаесетпалачното црево. Сондата ќе се користи уште една недела, а потоа ќе се отстрани – објаснува за „Слободен печат“, д-р Пановски.
Тој не гледа проблем во тоа што, иако не е детски хирург, туку дигестивен, оперирал бебе.
– Во текот на мојата долгогодишна кариера многу пати сум асистирал на колегите од Клиниката за детска хирургија. Тие лиценцираните детски хирурзи пет пати неуспешно го оперирале детето – вели д-р Пановски.
Д-р Митрев објаснува дека кога имаат некој комплициран случај како овој се консултураат со надворешни соработници, меѓу кои и лекари од странство, но операциите ги прават самостојно.
– Нема потреба во операциските сали во мојата болнциа да влегуваат лекари странци, ние сме доволно стручни за да може да оперираме. Тоа со детските хирурзи и детските кардиохирурзи нема никакво значење, ние сме сите хирурзи со огромно искуство и нема потреба да се прави никаков проблем околу тоа – вели Митрев.
Тој објаснува дека истото важи и за кадриохируршките операции кај новороденчињата со вродени срцеви мани. Тој ја демантира изјавата на министерот Венко Филипче дека странски лекари ги оперираат овие деца во „Жан Митрев клиника“.
– Јас сум доволно стручен за да можам да оперирам и бебиња, нема лекари од странство, не знам зошто се појавуваат такви информации. Порано не го правев тоа, бидејќи во старите простории на болницата немаше услови, но сега тоа е надминато – вели Митрев.