Поранешниот министер за здравство Имер Селмани вели дека обвинителството и другите надлежни тела во државата треба да го имаат последниот збор околу пожарот во тетовската модуларна болница, како и дека додека не заврши истрагата, не треба да се брза и да се обвинуваат функционерите кои понудија оставки по трагичниот настан.

Во изјава за Алсат, Селмани вели дека случајот не смее да се затвори само со оставки на раководните лица.

„Оставките се само морален чин и истражителите и обвинителството, сите тие институции кои треба да го решат случајот, мораат да ја завршат работата докрај. Иако последниот, одлучувачки збор треба да се очекува од обвинителството, не треба да се брза и да се судат оние кои понудија оставки“, вели Селмани.

Она што се случи е голема катастрофа, но такви случаи за жал има и во други земји, додаде поранешниот министер.

„Но овде, покрај оставките, виновникот дефинитивно мора да се открие. Се разбира, откриениот виновник тогаш ќе сноси одговорност и казни кои се предвидени во други закони“, рече тој.

Во катастрофалниот пожар во тетовскиот модуларен ковид-центар на 8 септември загинаа 14 луѓе, а 12 беа повредени. По несреќата, оставки до владата понудија министерот за здравство Венко Филипче и неговиот заменик, Илир Хасани, како и двајцата директори на тетовската Клиничка болница. Нивните оставки не беа прифатени, а премиерот Зоран Заев повеќепати повтори дека ќе ги чека резулатите од истрагата, пред да одлучи дали ќе ги прифати одлуките на Филипче и Хасани да се повлечат.