Лидерот на Алијанса за Албанците, Зијадин Села, денеска изјави дека „целата работа што се тера“ околу учеството на Левица во иницијативата за ново парламентарно мнозинство, е „дел од пиарот на ДУИ“. Села вели дека партијата има само два пратеника и не е во можност ниту да ја тргне Македонија од патот на НАТО, ниту пак да издејствува земјава да го повлече признавањето на Косово.

Села ја коментираше изјава на пратеникот на Алтернатива, Скендер Реџепи – Зејд, кој рече дека неговиот потпис ќе биде дел од иницијативата за уривање на владата под услов на тој список да не бидат потписите на Левица.

„Човекот кога има некоја грижа се обидува да најде неосновани изговори и лаги. Никој не е дете и секој знае дека листата што е потпишана е потпишана за да падне владата. Идејата за владата да падне, да има ново мнозинство, е граѓаните да бидат послободни. Кога зборуваме за слободата нема потреба никој никого да манипулира. Нема да навлегувам во детали затоа што воопшто не е вистинито тоа што го слушнав. Немам потреба некого да мамам. Секогаш сум бил отворен, особено сум внимателен со пратеници кои се дел од коалицијата и идејата е граѓаните слободно да одлучат по своја волја на избори ако констатираме дека еден државен апарат ја ограничува слободата и ги уценува граѓаните“,рече Села.

Според Села, ставот на Реџепи-Зејд не мора да значи дека е пропаднато новото парламентарно мнозинство.

„Премиерот се двоуми дали да даде оставка или не, ние како опозиција му помагаме да го натераме да се одлучи за оставката. За таква постапка е потребно 20 пратеници. Ние имаме 61 потпис на пратениците што е доволен број за да падне овој хибриден режим“, посочи Села.

Прашан дали за него се проблематични потписите на Левица, тој истакна дека целата работа што се тера е дел од пиарот (ПР) на ДУИ.

„Се зборува за една политичка партија којашто е сега формирана и која има два пратеника. Тие ниту се во можност да ја тргнат Македонија од патот на НАТО, ниту се во можност да го тргнат јазикот од законот за употреба за јазиците, а на никаков начин не можат да го тргнат признавањето на Република Косово. Овој начин на водење на ПР е многу низок и го покажува лицето на ДУИ, на кој им е важна само власта. Ако треба да се зборува за нешто антиалбанско зошто не се зборува за СДСМ или за ВМРО или се плашат дека некој ден треба да седнат со нив за да прават власт, а сега се занимаваат со некој потпис на политичка партија која е потпишана само за да падне ова влада“, рече Села.