Иако во одредени моменти од натпреварот имаше негатива и од четири голови разлика, Вардар со позитивен резултат ќе го стартува реваншот од четвртфиналето против екипата на Нексе во СЕХА Газпром лигата.

Денеска македонскиот и регионален шампион го одигра првиот дуел во Нашице (Хрватска), кој заврши со минимална победа од 30:31.

Руското лево крило на „црвено-црните“ Дибиров одигра одличен дуел, постигнувајќи 12 голови. Скубе имаше 6, додека Шишкарев и Горбок имаа по четири погодоци. Ристовски Борко имаше седум одбрани во деби натпреварот за Вардар.

На спротивната страна за хрватскиот претставник седум голови беа дело на Пешиќ, два помалку запиша Кевиќ.

Дали тоа ќе биде доволно за пласман на Фајнл-фор турнирот во Задар, останува да се види после возвратната пресметка која е закажана за 15. март во СЦ „Јане Сандански“ – Скопје.

Во првите мечеви од четвртфиналето на останатите три дуели: Војводина-Веспрем (26:31, Дејан Манасков без погодок), Мешков Брест-Мотор Запорожје (30:28) и Татран Прешов-ППД Загреб (21:25).