Македонските одбојкари ја забележаа првата победа во серијата пријателски натпревари во подготвителниот циклус за ЕП 2019. Во салата “Кале” во Скопје, црвено-жолтите се радуваа против Шведска со 3:2 и конечно ја почувствуваа сласта на победата по долгиот период на напорни тренинзи на физички план во Маврово.

За разлика од двомечот на гостински терен со Романија минатиот викенд, избраниците на селекторот Никола Матијашевиќ денеска одиграа подобро иако се уште не се во посакуваната натпреварувачка форма. Сервисот се уште не е на највисоко ниво, недостасуваат поени од блок, а нападот беше продуктивен кога немаше проблеми со приемот.

Одбојкарите утре ќе одржат заеднички тренинг со репрезентативците на Шведска, а в недела ќе го одиграат и вториот контролен натпревар.