Најмалку седум лица загинаа во затвор во Гватемала, соопшти Министерството за правда, пренесе ДПА.

Окружното обвинителство од Куецалтананго го изведе увидот на местото на трагедијата, во  Центарот за рехабилитација „Кантел” во Куецалтананго, на западот од Гватемала.

Според локалните медиуми, седумте жртви биле затвореници убиени за време на бунт во затворот.

Канцеларијата на Народниот правобранител (Прокурадор де лос Дерехос Хуманос, ПДХ) соопшти дека „насилството резултирало со смрт на неколку лица” и констатира дека затворот е пренаселен за 200 проценти, пренесе германската агенција.

Омдусманот соопшти дека отворил истрага за настаните во центарот за рехабилитација.