Минатата недела во Србија беше одржан петдневен бојкот на петте најголеми трговски синџири, чии финансиски ефекти сè уште не се познати, но потрошувачите не сакаат да застанат тука. Затоа здруженијата веќе најавуваат нови бојкоти, но овој пат на поединечни синџири. Во Србија одамна не е нова вест дека цените во продавниците се многу високи, но од неодамна потрошувачите почнаа да „удираат“ на малопродажните синџири, пишува Данас. Бранот бојкоти на големите трговци почна во Хрватска, а потоа го зафати целиот регион, а на него не остана имуна ниту Србија. Овде „бунтот“ започна на повик на Здружението за заштита на потрошувачите Ефектива да ги бојкотираат петте најголеми трговски синџири – Делезе (Макси и Шоп&Го), Меркатор (Рода и Идеа), ДИС, Универекспорт и Лидл на еден ден.

После еден ден, граѓаните беа повикани да ги бојкотираат истите синџири пет дена. Причината за тоа беше што ништо значајно не се промени по првиот бојкот, а некои трговци дури и ги покачија цените. Претседателот на ова Здружение, Дејан Гавриловиќ, вели дека сè уште не се познати финансиските ефекти од овој петдневен бојкот. „Тоа може да ни го даде само даночната управа.

„Им пишав во петокот и очекуваме да пресметаат како минатиот пат, па ќе го видиме вистинскиот ефект“, рече тој.

Оценката на Гавриловиќ е дека приходите се за 25 до 30 отсто помали во однос на претходната недела. Тој нагласува дека е очигледно дека некои трговци дале интересни попусти и дека некои производи се поевтини од кога било.

„Но, тоа не беше наше барање и барање на сите потрошувачи, туку цените трајно да се намалат за да бидат прифатливи за нашиот стандард, но и трговците да остварат профит, бидејќи тоа е смислата на нивниот бизнис. Но, не да имаат екстра профит и пет трговци да имаат над 105 милиони евра добивка“, вели Гавриловиќ, пишува Нова.рс.