Седлоски ќе ги води надежите на Динамо Загреб во ЛШ!?
Поранешниот македонски репрезентативец како наследник на Игор Јовичевиќ е најголем кандидат за клупата на вториот тим на „модрите“.
Како што пренесуваат хрватските медиуми, поранешниот македонски репрезентативец би можел да го води вториот тим на Динамо Загреб.
Своевремено како професионален фудбалер Гоце Седлоски беше дел од првата екипа на „модрите“ со кои успеа трипати да биде шампион во најсилното хрватско првенство.
Неколку пати се шпекулираше и како прв кандидат да ги води најдобрите на Динамо Загреб (во чии редови игра нашиот репрезентативец Аријан Адеми), но немаше трансфер. Но, еве можно е да биде дел од „Максимир“, но во втората екипа како замена за Игор Јовичевиќ кој би требало да седне на клупата на првата екипа.
Во комбинација беа уште тренерот на Истра, Иван Прелец и поранешниот кормилар на Горица, Сергеј Јакировиќ, но изборот падна очигледно на Македонецот. 46-годишниот стратег во тренерската кариера ги водеше уште Турново, Вардар, Рига и Широки Бријег.
Инаку вториот тим на Динамо Загреб до прекинот на сезоната поради пандемијата на коронавирусот имаше успешна сезона во младинската Лига на шампионите. Во осминафиналето го елиминираше Баерн Минхен, а во четвртфиналето хрватската екипа треба да ги одмери силите против Бенфика.
