Капацитетите на Инфективното и Б кракот на Интерното одделение се целосно исполнети со 54, односно со 15 пациенти со ковид-19, па викендот за новите инфицирани лица ќе биде ставено и Физикалното одделение кое е засебен објект на велешката Општа болница, информира докторката Весна Неделковска Николова.

Таа информира дека од минатата недела во ковид центарот на Инфективно одделение, покрај дерматовенерологот и интернисти, од велешката Општа болница самоиницијативно се вклучил и младиот д-р Атанас Ѓоргиевски, специјалист кардиолог од Велес, вработен во ПЗУ „Медикус“ од Кавадарци.

– Пример на хуманост да се помогне на своите сограѓани кога е најпотребно во битката со тешката епидемија, а што треба да го следат и други лекари, потенцира Неделковска Николова.

Инаку, во велешката Општа болница заразени се четворица лекари, од кои двајца интернисти, еден психијатар и еден доктор од одделот за анестезија.