Се повеќе злосторства од омраза спрема Кинези: Промена на свеста заради коронавирусот или покажување на вистинското лице?
Злосторствата од омраза спрема Кинезите во Велика Британија пораснале за време на епидемијата на коронавирусот, покажуваат податоците од британската полиција.
Во првите три месеци на 2020 година, за време на кризата на Ковид-19 забележани се најмалку 267 кривични дела, вклучувајќи и напади, грабежи и вознемирување.
Жртвите опишувале дека на улица ги удирале, плукале и навредувале заради коронавирусот откако првиот случај беше пријавен во Кина.
Стапката на злосторства од омраза спрема Кинезите меѓу јануари и март била речиси три пати поголема во однос на претходните две години, покажале податоците кои британската полиција ги проследила до Скај њуз.
Џереми Ву, студент и медицински техничар кој работи во Велика Британија, рекол дека се соочил со дискриминација на некои пациенти и колеги, при што еден соработник го прашал зошто не се врати во својата земја со својот вирус.
Ву рекол дека плачел пред да спие и дека се чувствувал осамено, бидејќи немало никој со кој би можел да разговара за тоа прашање.
– Порано или подоцна луѓето ќе сфатат дека е смешно да се поврзува пандемиски вирус со одредена група на луѓе, како ХИВ со ЛГБТ заедницата за време на 80-тите, рекол тој.
Мајкл Чиу, студент на Шефилд Хелам универзитетот, изјавил дека од автомобил фрлале овошје по него заради коронавирусот.
– Јас сум роден во Британија и немам апсолутно ништо со коронавирусот, а што е уште поважно вирусот не дискриминира начин и облик, рекол тој.