Турскиот претседател Реџеп Таип Ердоган денеска поднесе кривична пријава до турските власти против истакнатиот холандски екстремно десничарски лидер Герт Вилдерс затоа што, како што рече, го навредувал на социјалните мрежи, пренесува турската државна агенција Анадолија.

Вилдерс во саботата објави карикатура на Ердоган, со опис „терорист”, а вчера сподели фотографија на брод со турско знаме што тоне со напис „Збогум Ердоган! Исфрлете ја Турција од НАТО”, напиша тој под фотографијата.

Адвокатите на Ердоган поднесоа кривична пријава до обвинителството во Анкара, тврдејќи дека турскиот суд има надлежност за случајот затоа што навредите биле насочени против турскиот претседател, пренесе Анадолија, повикувајќи се на документ поднесен од адвокатите.

Тие велат дека коментарите на Вилдерс не може да се сметаат за слобода на изразување и дека мета на Вилдерс се „честа, достоинството, карактерот и угледот на Ердоган”.

Кривична пријава против Вилдерс беше поднесена еден ден откако Ердоган ги повика Турците да ја бојкотираат француската стока поради сликите на пророкот Мухамед што се објавуваат во Франција, а кои некои муслимани ги сметаат за богохулство.