Администрацијата на американскиот претседател Доналд Трамп се очекува да ја прогласи Венецуела за држава која го спонзорира тероризмот и ќе покрене обвинение против нејзиниот претседател Николас Мадуро, објави Си-Ен-Ен.

Со таквиот потег ќе се достигне најниската точка во односите меѓу САД и Венецуела.

Ваквото етикетирање на Венецуела, Вашингтон досега го имаше само за четири други земји – Северна Кореја, Иран, Судан и Сирија, кои „постојано поддржувале акти на меѓународен тероризам“, ќе и овозможи на американската Влада да воведе натамошни построги санкции против управувањето на Мадуро.

Се очекува обвинителите од Министерството за правда на САД да поднесат обвиненија против Мадуро и високи владини претставници, соопштија извори за Си-Ен-Ен. Засега не е познато за кои конкретни кривични дела се обвинети, но изворите велат дека тие се поврзани со зголемена трговија со дрога, во која Венецуела е дел од тоа криумчарење.

Јавниот обвинител Вилијам Бар се очекува да ги објави квалификациите и обвиненијата на прес-конференција. Портпарол на Министерството за правда одби да коментира, а Си-Ен-Ен се обрати до Стејт департментот, кој официјално ги означува финансиерите на тероризмот.

САД и многу други држави и меѓународни тела го признаа претседателот на Националното собрание на Венецуела, Хуан Гуаидо за лидер на земјата, а администрацијата на Трамп започна кампања за агресивна економска казна насочена кон соборување на Мадуро од власт.