Се набавуваат нови резервоари за пречистителната станица во „Југохром“
Министерството за животна средина и просторно планирање (МЖСПП) информира дека веќе е во тек реализација на три јавни набавки за обновување на пречистителната станица за редукција на шествалентниот хром во „Југохром“, Јегуновце, и тоа за нови резервоари за пречистителната станица, за одржувањето на системот и за далечинско управување, пишува во дописот од Министерството.
Од МЖСПП појаснуваат дека пречистителната станица за прочистување на загадените води со шествалентен хром во околината на Јегуновце, поради дотраеност во изминатиот период не работела во полн капацитет.
„Поради исклучителното значење на прочистувањето на шествалентниот хром и спречувањето на истекување или прелевање на загадената вода, Министерството направи дополнителни напори и одвои средства за покривање на трошоците за реконструкција на инсталацијата“, информираат од Министерството, од каде што најавуваат и реконструкција на заштитното корито под резервоарите и поставување нови резервоари, процес што треба да завршат до средината на ноември.
Фабриката „Југохром“ ја посетиле министерот за животна средина Насер Нуредини и државниот секретар Каја Шукова, каде што биле информирани од управата на затворената фабрика дека тие ги следеле состојбите околу отпадните води на депонијата.
Минатата недела „Слободен печат“ појде на индустриската депонија во Јегуновце и сними слободно истекување на канцерогениот шествалентен хром директно во Вардар.